Final Fantasy XVI ofrece detalles do seu universo e personaxes en novas imaxes

Sen dúbida, Final Fantasy XVI foi un dos anuncios máis chamativos dentro daquel evento de presentación de PS5 que viu setembro. O futuro xogo da franquía de Square Enix estreou páxina web e Naoki Yoshida, produtor da aventura, acaba de ofrecer non poucos detalles sobre o universo fantástico no que se desenvolverá a historia.

Yoshida bautizou este novo mundo como Valisthea, unha terra perforada por unhas enormes montañas de cristal coñecidas como Mothercrystals. Os protagonistas deste Final Fantasy pertencen ao Gran Ducado de Rosaria e loitan por protexer estes cristais, ao viviren baixo a súa bendición e posuír unha boa fortuna. Enténdese que tamén se desenvolveron guerras polo control destes lugares entre Rosaria, o Sacro Imperio de Sanbreque, o Reino de Waloed, a República de Dhalmekia e o Reino de Ferro. Agora, malia que unha relativa paz, semella que a aparición dun mal coñecido como a Praga crebará esta fráxil situación.

Clive Rosfield, principal protagonista desta entrega.

Clive Rosfield eríxese como o protagonista principal do xogo. É o fillo primoxénito do Archiduque de Rosaria, e verase «arrastrado a unha gran traxedia» mentres trata de protexer o seu irmán pequeno. O produtor xaponés descríbeo como un escudo valeroso que loita por defender ao seu irmán Joshua, o Dominante do Fénix.

En Final Fantasy XVI as invocacións pasarán a ser chamadas Eikons, seres co poder de cambiar o final dunha guerra ou destruír nacións e que habitan dentro dun Dominante. Así é, Joshua é o dominante do Fénix, poder que usa para protexer á súa terra e á súa familia. O trío protagonista péchase con Jill Warrick, unha amiga de sempre que creceu xunto cos dous irmáns, orixinaria dos Territorios do Norte, nación que xurou lealdade a Rosaria para garantir a paz entre os dous lugares.

O xogo non conta con data de lanzamento aínda, aínda que si se confirmou que leva máis de catro anos de traballo, polo que a súa chegada podería estar máis próxima do que un podería agardar, sobre todo se pensamos en Square Enix.

Ilustración do trío principal da aventura.