A GDC adíase até o próximo verán por mor do coronavirus

Cancelacións, ausencias e atrasos en conferencias foron a tónica habitual durante as últimas semanas. Agora, a organización da Game Developers Conference decidiu cancelar este evento que tiña prevista a súa celebración entre o 16 e o 20 de marzo en San Francisco. Todo isto debido á posíbel propagación do coronavirus entre os asistentes, polo que se decidiu evitar o contaxio suspendendo temporalmente o evento.

Tal e como aseguran no seu comunicado oficial, os organizadores teñen «a intención de celebrar outro GDC este verán. Estaremos en contacto cos nosos socios e difundiremos máis información nas próximas semanas». Algunhas das empresas máis relevantes do sector do videoxogo tiñan cita na GDC, como Microsoft, Sony, Epic Games, Facebook, Kojima Productions e Amazon.

Porén, a entrega de premios dos The Game Developers Choice Awards e do Independent Games Festival si que serán retransmitidos por internet, vía Twitch. Incluso aquelas persoas que tiñan prevista realizar algunha conferencia poderán enviala en formato vídeo e será publicada de balde. A GDC únese a outras grandes feiras que se viron obrigadas a cancelar a súa celebración nas próximas datas, como a Mobile World Congress, a EVE Fanfest ou o Salón do Automóbil de Xenebra.

O evento terá lugar probablemente en verán deste ano.