A xustiza estadounidense impide o bloqueo de Unreal Engine por parte de Apple

Continúa a guerra pública entre Apple e Epic Games. Unha vez as disputas chegaron ao terreo xurídico, a xustiza estadounidense publicou a orde de protexer a viabilidade de Unreal Engine, ao mesmo tempo que ratifica as accións emprendidas por Apple até o de agora.

O primeiro asalto xudicial saldouse coa lexitimación do bloqueo de Fortnite dentro da App Store, o cal adxudicaba un primeiro punto para a compañía da mazá. Doutra banda, tamén se atendeu a petición de Epic Games de restrinxir a Apple a posibilidade de bloquear o acceso a macOS e iOS para traballar no seu motor.

Tal e como recolle a xuíza Yvonne Gonzalez Rogers, Epic rompeu os acordos referentes a Fortnite aínda que non vulnerou ningunha norma respecto a Unreal Engine. Acusou a Apple de actuar con severidade e de poñer en risco a outras desenvolvedoras que traballan con esta tecnoloxía.

O 28 de setembro é a nova data para que ambas as dúas compañías expoñan as súas argumentarios fronte os tribunais; todo iso orixinado após a eliminación do battle royale da tenda dixital de Apple por non cumprir coas normas establecidas sobre as compras dentro do título.