Abel Caballero e as luces de Vigo xa teñen o seu videoxogo

Non é mal día para lembrar que a empresa viguesa Hacce, especializada en deseño dixital e interacción, vén de publicar un xogo colaborativo que colle como base un dos asuntos máis comentados do Nadal galego: as luces de Vigo. A aplicación permite ao xogador ser Abel Caballero e acometer a tarefa de acender as famosas luces. O reto? Prender os 100 millóns de LED. O nome do xogo non podía ser outro que JingABELs (Ilumina como puedas).

O título está dispoñíbel en calquera navegador, de balde. Segundo parece, os responsábeis do seu desenvolvemento comentan que o obxectivo da súa creación non é outro que felicitar con algo de humor estas festas, amais de propoñer unha aventura colaborativa e participativa. Na práctica, trátase dunha xogabilidade moi sinxela, na que abonda con facer clic nas luces de cada monumento.

Conseguirán os vigueses acender todas as luces?