Assassin’s Creed Valhalla detalla o seu pase de tempada de cara ao futuro

Menos dun mes sepáranos da chegada de Assassin’s Creed Valhalla e Ubisoft detallou os plans posteriores ao lanzamento para o seu título ambientado durante a época viquinga. O pase de tempada custará un total de 39,99 euros, incluíndo dúas expansións narrativas e novas misións.

A ira dos druídas será a primeira delas, cunha data programada para primavera de 2021 e que trasladará ao noso personaxe até Irlanda. No verán do próximo ano chegará O asedio de París, que nos permitirá coñecer algunhas das personalidades máis transcendentais da Francia occidental. Por último, A Lenda de Beowulf poñerá sobre o taboleiro ao mito viquingo e será a misión exclusiva dispoñíbel desde o primeiro día.

Porén, non todo o contido futuro será de pago, xa que co tempo aparecerán novos engadidos e eventos. A través de tempadas trimestrais, coñeceremos diferentes elementos, sendo o primeiro o de decembro. Contará cunha nova zona de asentamento, un festival viquingo tradicional, novos modos de saqueo e o establecemento de rangos de jomsvikingos.

A segunda tempada lanzarase en marzo de 2021, xunto con novo modo de xogo, festivais, armaduras e elementos cosméticos novos. Ubisoft emprazounos a coñecer o contido das tempadas 3 e 4 de Assassin’s Creed Valhalla no futuro.