![Bethesda detén de xeito indefinido o desenvolvemento de The Elder Scrolls: Legends](https://revistamorcego.com/wp-content/uploads/2019/12/TES-Legends_2018website_HomepageGuideSection-01-786x436.jpg)
Bethesda detén de xeito indefinido o desenvolvemento de The Elder Scrolls: Legends
Bethesda tira do freo de man. The Elder Scrolls: Legends, o xogo de cartas F2P que a compañía americana ofrece aos seus xogadores entrará nun período indefinido de espera. Até novo aviso, non recibirá novas expansións nin novo contido de ningún tipo.
Publicado no 2017 para PC, iOS e Android, o título foi aumentando de tamaño grazas ás oito expansións de pago lanzadas. A máis recente, Jaws of Oblivion, saíu hai uns meses, en setembro.
A través dun post no subreddit de Legends, a compañía explica que a súa «última folla de ruta indicaba que lanzariamos unha expansión máis este ano», pero que se decidiu «suspender calquera desenvolvemento de contido novo ou lanzamentos no futuro inmediato». Á marxe deste anuncio, todo aquel que queira seguir xogando ao título poderá facelo sen ningún tipo de problema, tanto no seu modo single player, como nas súas partidas en liña.