Biomutant fixa por fin a súa data de lanzamento en PS4, Xbox One e PC

Hai moitos xogos que merecen un ‘por fin’ no titular e, sen dúbida, Biomutant e a súa data de lanzamento é un deles. A obra de Experiment101 estará dispoñíbel o vindeiro 25 de maio en PS4, Xbox One e PC, tal e como foi confirmado desde a conta oficial do xogo en Twitter.

Anunciado no ano 2017, foi presentado como unha aventura action-RPG con contornas abertas e vivas. O seu aspecto visual chamou a atención desde o inicio, malia que pronto se comprobou como apenas había detalles novos sobre un xogo que ía atrasando o seu lanzamento ou a súa xanela para tal asunto, a cada pouco. Previsto para finais do 2020, finalmente chegará este ano.

Dun xeito ou outro, os xogadores poderán comprobar se ese desenvolvemento tan lonxevo foi para ben ou para mal. Oxalá o primeiro. Quen non quere ser un mapache con poderes mutantes e un enorme arsenal co que acabar coa vida dun planeta enteiro?

Biomutant is coming to PC, PlayStation 4, and Xbox One on May 25th, 2021. pic.twitter.com/qVdTMaxxS5

— Biomutant (@Biomutant) January 26, 2021