Actualidade Bivestour e Polygone Studio aúnan turismo e videoxogos

Bivestour e Polygone Studio aúnan turismo e videoxogos

Polygone Studio xa se atopa traballando nun novo proxecto tras a exitosa publicación de CricktoGame  para Nintendo Switch. En colaboración con Biverstour, unha das empresas referentes en Galicia en xestión de viaxes, expoñen unha sinxela cuestión: «É posible atraer turismo usando un videoxogo?» Para ámbalas dúas empresas, a resposta é clara: «si».

Tanto Abilio Álvarez, xerente de Bivestour, como Miguel Areán, responsable de Polygone Studio focalizan esa crenza e danlle forma en Sons Of Breogham, título no que o xogador percorrerá o reino de Galimdor nun trepidante RPG ao máis puro estilo de grandes clásicos do xénero como The Legend of Zelda: A Link to the Past.

No xogo van aparecendo misións que o xogador debe tratar de superar para ir recibindo recompensas, entre as cales podería estar, por exemplo, unha viaxe paga para coñecer o auténtico reino de Galimdor que, como sospeitas, é terra de meigas.

O título que estará dispoñible en Steam e Nintendo Switch, así como nos principais sistemas operativos para dispositivos móbiles. O proxecto foi convidado a participar no TurisTIC, celebrado hoxe no Museo Verbun de Vigo coa colaboración da Deputación de Pontevedra. Aínda non achegou unha data de lanzamento oficial.

 

 

Carlos Pereiro

Creador de Morcego. Escribo cousas, falo de cousas e encántame escoitar cousas.