Borderlands 3 déixase querer (e moito)

En Gearbox téñeno claro: Borderlands 3 vai ser un xogo para vivir intensamente. Nun evento que contou coa presenza de centos de xornalistas e creadores de contido chegado de todo o mundo, o estudio norteamericano amosou ao mundo a acción real do título nunha retransmisión en directo de case unha hora. O título chegará en setembro a PlayStation 4, Xbox One e PC (Epic Store).

Se cos anteriores títulos da saga os seus deseñadores foron máis cautos á hora de ir ensinando material, con esta cuarta entrega sacáron todos os focos posibles e apuntáron con eles ao seu nome. Despois da finalización do gameplay por parte dos propios probadores do estudio, os centos de streamers e profesionais da comunicación puideron xogar preto de hora e media ao xogo. As plataformas de retransmisión máis coñecidas do mundo, Twitch, Mixer e Youtube, víronse invadidas nuns minutos polas partidas en directo de Borderlands 3. Vese que Apex Legends sentou certa cátedra neste tipo de presentacións.

Borderlands 3 segue apostando por un de ton vándalo, pero efectivo.

E así, por fin, púidose ver o terceiro capítulo numérico en acción e as sensacións que deixa son máis que positivas. Gearbox foi pola vía fácil, a da verdade, e non quixo pór sobre a mesa a idea dunha revolución dentro dos looter-shooter, ou un cambio de visión repentino e enigmático. Non. A nova entrega apréciase como unha evolución continuista e á vez magnífica, potenciando os seus puntos fortes e obviando os máis débiles.

Máis áxil, máis acción, máis Borderlands

O novo título de Gearbox promete disparos por milleiros. Farao a través dun sistema de combate dinámico con melloras directas na xogabilidade. Os deseñadores fixeron os deberes e engadíronse dúas mecánicas amplamente coñecidas na actualidade: os esvaramentos polo chan e a interacción directa co escenario. O primeiro movemento funcionará tanto ofensiva como defensivamente e engade unha dose de adrenalina nos tiroteos. A segunda acción foi explotada varias veces ao longo do gameplay, permitindo ao xogador lanzar barrís (de ácido, eléctricos, explosivos…) para logo detonalos dun disparo, sen ter que esperar a que sexa o inimigo o que se posicione preto deles. Todo dunha maneira áxil e natural.

Doutra banda, non se viron todas as armas prometidas no anuncio (nin se poderán ver en mil anos) pero confirmouse unha das filtracións: moitas delas terán un funcionamento duplicado, é dicir, un modo de disparo principal e outro secundario. A primeira mostra desta mecánica evidenciouse coa primeira pistola que sae na demostración. Cun simple botón altérnase entre ambos modos. Entre balas e mini-misiles, no exemplo amosado.

Unha interface familiar

De novo teremos un mapa que nos servirá de axuda para non deixar un metro do terreo sen percorrer. Os escenarios terán elementos destructibles polo que as coberturas non serán infalibles ante a presión dos inimigos. Ademais, a medida que avancemos, o mapa irase volvendo verde polas zonas que explorásemos, manténdose azul por onde non. Útil, claro.

No resto de elementos, todo resulta familiar. A barra de vida e armadura continúan tendo esa estética cartoon, e percíbese unha evolución gráfica. Está claro que non se pasou ao fotorrealismo, nin esa é a aposta de Gearbox, pero puíronse os modelos e a distancia de debuxado apréciase moito maior. Os danos inflixidos aos inimigos, os famosos numeriños, tamén recibiron a súa propia mellora, sendo máis visibles e vivos.

Armas e niveis, bos amigos

Outra filtración que se volve real. As armas non terán soamente un nivel como o que tiñamos até agora, e que serve como un bloqueo á hora de poder manexala, senón que agora existirá un indicador de eficiencia que fará moito máis intuitivo saber se a arma que atopemos durante a misión é realmente mellor, en liñas xerais, que a que xa temos. Por suposto, haberá unha boa cantidade de estatísticas: dano, velocidade de recarga, certeza, retroceso…

Un loot para cada xogador

Si, por suposto que haberá un modo cooperativo pero esta vez non haberá que preocuparse por quen leva o mellor botín. O loot en Borderlands 3 será individual polo que adeus ás pelexas. Non acaba aí a cousa; agora cada usuario verá un nivel de inimigos concreto e as armas que vaian aparecendo tamén se adaptarán ao xogador. Que un amigo leva máis tempo xogando? Non hai problema, poderedes xogar xuntos igualmente.

É moi interesante saber que as armas que non recollamos aparecerán logo na nosa nave (da que xa falaremos), eliminando así o medo de deixarnos unha atrás que puidese tentarnos. Aquí aproveitarase todo. E se non estás convencido, existe un modo clásico para xogar co mesmo sistema de botín que os anteriores Borderlands.

E as habilidades? Máis e mellor

Vistas as armas, toca falar dos personaxes. Gearbox quixo revisar un apartado no que, até agora, podiamos escoller entre catro clases protagonistas, cada un con habilidades especiais das que iamos facendo uso nos tiroteos. En Borderlands 3 non é que haxa unha habilidade especial por personaxe, senón que teremos até tres.

A árbore de melloras disparará o compoñente RPG ao verse mellorada de maneira drástica. As animacións das habilidades locen xeniais e prometen diversión non, o seguinte. Segundo avancemos, poderemos desbloquear máis habilidades para equipar un par delas nos espacios de activación que o personaxe ten.

O sistema de progresión de habilidades parece grande e rico.

Até o espazo e máis aló

Pandora quedou pequena. A acción desta nova entrega levaranos a diversos planetas da galaxia. Para iso accederemos á Sanctuary III, unha nave especial coa que percorreremos o espazo profundo. A acción que viviremos sobre os planetas contrasta coa calma que se respira nos corredores deste lugar, no que poderemos falar con diversos NPC (si, aí estarán  Markus, Ellie, Claptrap, Mad Moxxi ou Sir Hammerlock). Poderemos colleitar aquí o botín perdido como se apuntaba unhas liñas arriba; ademais de abrir diversos cofres, comprar melloras e, si, claro, elixir o seguinte destino.

E non, non poderemos pilotar a nave até o planeta que escollamos. Chegaremos a el a través dunha viaxe rápida. Con todo, a Sanctuary III preséntase como unha contorna acolledora e tranquila na que repoñer forzas para logo gastala a golpe de adrenalina e, como non, de balas e granadas. Por certo, se morremos haberá máis esperanza que o xa mítico «loita pola túa vida», agora poderemos revivir e ser revividos por un NPC.