Capcom confirma a creación dun DLC para Resident Evil Village

Capcom aproveitou o E3 para anunciar (ou máis ben confirmar) que xa está a traballar nun DLC para Resident Evil Village. «Por mor da demanda popular comezamos o desenvolvemento dun DLC adicional para Resident Evil Village. Máis información posteriormente», reza a mensaxe que a compañía compartiu co público. Ten certa graza a xustificación, porque era máis que evidente que Capcom tiraría por este camiño vendo o enorme éxito que logrou co seu novo lanzamento.

Non hai máis detalles sobre esta expansión, nin o contexto no que se desenvolverá, e, por suposto, tampouco unha data. Emporiso, a compañía xaponesa si puxo data a Resident Evil RE: Verse, o seu estraño multixogador co que pretende celebrar o 25 aniversario da franquía. Chegará en xullo de xeito gratuíto, para todos aqueles que teñan unha copia do último título lanzado, sexa en consola, sexa en PC.