Actualidade Caso Telltale: demandas dos antigos empregados e retirada temporal de TWD

Caso Telltale: demandas dos antigos empregados e retirada temporal de TWD

Segundo o acontecido nos últimos días e unha vez sabido que os despidos masivos en Telltale Games afectarían a preto de 250 empregados, toca agora sumar outro controvertido capítulo a esta historia, pois algúns ex empregados demandaron á compañía estadounidense polas duras condicións de traballo no estudio e a falta de indemnizacións xustas tras a ruptura dos seus contratos.

Trataríase dunha demanda colectiva por infrinxir os seus dereitos laborais e violar o Worker Adjustment and Retraining Notification (WARN) ao despedir sen previo aviso ou liquidación económica. Segundo o WARN, os empregados deben saber do seu despido, polo menos, sesenta días antes de facerse realidade.

Se a demanda sae cara adiante, Telltale sería responsable do pago retroactivo e dos beneficios de todos os empregados afectados. Cabe dicir que na demanda figuran 275 despidos.

A compañía emitiu só dous comunicados dende o escándalo. Nun primeiro trataba de explicar que sucedera e indicaba que os despidos afectarían a un 90 % do cadro de persoal, mentres que no segundo pedía calma aos fans dos seus títulos, prometendo buscar unha solución para pechar a historia de Clementine, protagonista de The Walking Dead: The Final Season. Hoxe, o estudio suspendeu temporalmente as vendas / reservas do xogo.

Os capítulos 3 e 4 si manteñen a súa data de lanzamento, o 6 de novembro o primeiro e o 18 de decembro o segundo. Con todo, sería moi improbable velos finalizados ni tan sequera lanzados. Todo os indicios apuntan a que Telltale non sacará máis xogos da franquicia dos zombis. A propia actriz de dobraxe de Clementine, Melissa Hutchison, da o proxecto por tocado a afundido, sen posibilidades de recuperación.

Por non falar do proxecto de Stranger Things, do que tamén Telltale adquirira os dereitos. Netflix asume que o proxecto non sairá adiante e buscarán alternativas para poder facelo realidade. Esta mesma semana, filtrábase unha serie de clips inéditos do seu posible aspecto.

 

 

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *