Actualidade Champions of the Continent, o Octopath Traveler de móbiles, tamén sairá en Occidente

Champions of the Continent, o Octopath Traveler de móbiles, tamén sairá en Occidente

Square Enix confirmou o lanzamento en Occidente de Octopath Traveler: Champions of the Continent, precuela do exitoso Octopath Traveler lanzado no 2018 para Switch —xa na actualidade en PC tamén— e que só estaba dispoñible no Xapón.

A compañía xaponesa ofrecerá máis información a mediados de mes, mais fálase de Europa e Norteamérica como os territorios nos que será editado. Champions of the Continent foi publicado no país do sol nacente a finais de 2020, un par de anos despois do lanzamento de Octopath Traveler.

A nivel visual, é un título que mantén a estética do xogo orixinal, do mesmo xeito que as súas mecánicas, aínda que podemos manexar o dobre de participantes nas batallas, pasando de catro a oito. E, claro, os controis tamén están adaptados para dispositivos móbiles. É free-to-play e, como tal, contén diversos mecanismos para que acabemos por meter algo de cartod durante a nosa aventura para que sexa máis doada e sinxela. Nada é de balde nesta vida.

Champions of the Continent funcionou bastante ben en terras nipoas, por iso haberá que comprobar que tal se move polas nosas. A produción estivo a cargo de Tomoya Asano, implicado no xogo orixinal e que continúa traballando en Triangle Strategy, que parece ser a secuela espiritual do RPG publicado fai catro anos.

Carlos Pereiro

Creador de Morcego. Escribo cousas, falo de cousas e encántame escoitar cousas.