Chega o Summer Game Fest, a feira dixital mais grande dos videoxogos

Após a masiva cancelación das feiras presenciais na industria do videoxogo, moitas organizacións optaron por non renunciar aos seus eventos e apostaron polo formato en liña, tal e como foi o caso da Gamescom. Continuando este sendeiro, Geoff Keighley vén de anunciar a chegada do Summer Game Fest, un enorme evento dixital que terá lugar entre maio e agosto deste mesmo ano. Coma se fose un E3 alongado no tempo, a presenza de Sony, Xbox, Activision, Riot, Blizzard, Electronic Arts ou CD Projekt estará asegurada.

Malia que descoñecemos o contido que será revelado, si que se puido confirmar que Steam e Xbox permitirán o acceso a demos dos seus futuros títulos durante un tempo limitado. O evento de apertura da Summer Game Fest está ao virar a esquina, o vindeiro 7 de maio coa presentación dos xogos para Xbox Series X e finalizará o 24 de agosto con outro evento de clausura organizado polo propio Keighley. O festival será totalmente de balde e dentro duns días coñeceremos a segunda quenda de estudios que se unirán á el.