Cyberpunk 2077 regresa á PlayStation Store de PS5 e PS4 sen aviso previo

Xa é posible volver atopar o Cyberpunk 2077 na PlayStation Store. Sen aviso previo e sen anuncio oficial, o título de CD Projekt volveu a aparecer na tenda dixital de Sony. Iso si, polo momento, só é posíbel atopalo desde a consola e non desde a versión web.

Cyberpunk 2077 foi retirado da PS Store a finais do 2020 por mor da enorme cantidade de fallos que contiña a versión de PlayStation, con centos de bugs, amais dun rendemento terrible. As actualizacións que chegaron co tempo foron corrixindo algunhas destas problemáticas —non todas— e todo parece indicar que para Sony xa é suficiente. Podemos mercalo xa? Non, só aparece a súa ficha, pero é fácil entender que pronto será permitida a súa adquisición, pois si podemos engadilo á lista de desexados.

Algúns analistas explican que é posible que CD Projekt e PlayStation teñan xa un acordo de data, a anunciar nas próximas horas ou días —conferencia de Bandai do E3?—. Sexa como for, semella que o regreso da obra polaca a PlayStation está máis preto.