Actualidade Darkest Dungeon 2 amosa as súas primeiras imaxes

Darkest Dungeon 2 amosa as súas primeiras imaxes

Cun breve adianto audiovisual, Red Hook quixo confirmar ao seu público que Darkest Dungeon 2 xa é un proxecto con forma e intencións.

Do vídeo pode deducirse que a nova aventura contará cunha ambientación xeada, así como o regreso das seis clases orixinais (Highwayman, Hellion, Grave Robber, Leper, Man-at-Arms e Plague Doctor).

Foi o medio anglosaxón PC Gamer o que deu a noticia en exclusiva, así como o primeiro en achegar os detalles desta nova entrega. Nas declaracións ofrecidas, indícase que o xogo terá a súa propia “identidade temática”, polo que diversos aspectos do título orixinal serán modificados para simular unha viaxe constante. Manterase o sistema de combate, si, pero introduciranse novas mecánicas.

Rede Hook non descarta volver realizar un lanzamento en early access, tal e como fixo co primeiro Darkest Dungeon. Iso si, a súa narrativa transcorrerá, probablemente, despois dos feitos contados no DLC The Colour of Madness. Sen data oficial para a súa saída, toca esperar por futuros detalles.

O primeiro Darkest Dungeon gozou dunha enorme recepción despois do seu lanzamento grazas á súa dificultade e o seu divertido e entretido sistema de xogo.

 

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *