Diablo IV confirmado no anuncio dun libro de arte en Alemaña
Após os grandes anuncios da semana pasada por parte de Riot Games, semella que Blizzard está a se preparar para contestar na Blizzcon 2019, cita que se celebrará entre o 1 e o 2 de novembro. Grazas a un libro de arte distribuído pola empresa norteamericana, puidemos coñecer o que xa era un segredo a voces: Diablo IV atópase en desenvolvemento.
A arte de Diablo, nome oficial do produto, menciona de forma explícita detalles da nova entrega da franquía. Tal e como recolle o portal Eurogamer, unha das frases da promoción en Alemaña do libro menciona o seguinte: «preto de cincocentas ilustracións de Diablo, Diablo II, Diablo III e Diablo IV, con arte conceptual para o icónico RPG de acción de Blizzard Entertainment, o cal deu pesadelos a xeracións de fans».
Isto dende logo supón unha gran nova para todos os fans do famoso dungeon crawler, xa que Diablo III chegou ao mercado hai máis de 7 anos, polo que a idea dunha nova entrega é máis que posíbel. Nas últimas semanas tamén se rumoreou acerca da posibilidade de que Blizzard anuncie Overwatch 2 durante a súa feira, polo que estaremos atentos a todo o que suceda durante a Blizzcon deste ano.
