Actualidade Druckmann sobre o crunch en Naughty Dog: «Non poderemos previr o traballo duro»

Druckmann sobre o crunch en Naughty Dog: «Non poderemos previr o traballo duro»

Apenas unha semana é o tempo que hai até o regreso dunha das franquías máis exitosas de Sony nos últimos anos. The Last of Us Parte II chegará o 19 de xuño como un dos últimos grandes exclusivos para PS4 e desde Naughty Dog móstranse ilusionados coa súa estrea após as filtracións sufridas hai unhas semanas. Porén, o estudio tamén foi sinalado como reponsábel de fomentar o crunch entre os seus traballadores, con xornadas de traballo superiores ás doce horas. Respecto desta polémica pronunciouse Neil Druckmann, vicepresidente da desenvolvedora.

«Atraemos a xente que quere contar historias e que queren deixar a súa marca na industria. Para iso, van ter que traballar moi duro para logralo» declarou Druckmann. «Precisamos poñer algunhas varandas para que non se fagan dano a eles mesmos, pero non poderemos previr que traballen duro e sigan facendo o tipo de xogos que realizamos». A reportaxe de Kotaku que desvelou esta situación en Naughty Dog apuntaba que aínda que o crunch non adoita ser imposto pola directiva, si que se busca un perfil de traballador que estea disposto a completar as devanditas xornadas.

Como exemplo, Druckmann referiuse ao desenvolvemento da segunda entrega de Uncharted, durante o cal se prohibiu traballar pola madrugada e nas fins de semana, pero foron os propios traballadores os que se queixaron por estas regras. Na procura dun mellor equilibrio nas condicións laborais, Naughty Dog vai contratar un pequeno equipo de produtores. O seu labor consistirá en comunicarlles os cambios aos empregados do estudio, xa que unha das problemáticas máis importantes é a referente á falta de planificación no seo da compañía.

Todo iso derivou en que cada vez lle resulte máis difícil aos responsábeis de Jak & Daxter e a saga Uncharted atopar unha persoa que se adecue ao ritmo de traballo que se respira nas súas oficinas. Finalmente, Neil Druckmann insistiu en que «a dirección está a tentar mellorar neste eido sen destruír a liberdade creativa que lles gusta aos desenvolvedores aquí».

Juan Sanmartín

Colaborador de Morcego. Videoxogos, deporte, cómics ou cine son as miñas paixóns.