EA anuncia que Respawn Entertainment traballa en tres xogos de Star Wars

Electronic Arts acaba de anunciar que Respawn Entertainment ten até tres proxectos no forno relacionados coa franquía Star Wars. O primeiro que verá a luz está relacionado, como é natural, coa saga Jedi —posiblemente a continuación directa de Star Wars Jedi: Fallen Order—, no que traballa un equipo baixo a dirección de Stig Asmussen.

Doutra banda, estaría tamén en desenvolvemento un shooter en primeira persoa, dirixido por Peter Hischman, game director do estudio. O título estaría nos seus primeiros pasos de creación, polo que non deberiamos ter noticias reais sobre este até dentro de bastante tempo, e non esperar que vexa a luz ata o 2024 ou máis tarde.

Por último, a terceira aposta de EA coa marca Star Wars estaría centrada na estratexia e implicaría unha colaboración co estudio Bit Reactor, unha nova compañía formada por ex traballadores de Firaxis, con experiencia na creación de obras como Civilization ou XCOM.

O tres proxectos serán levados a bo porto baixo a batuta de Vince Zampella, director xeral e fundador de Respawn, e alma máter de Titanfall, Apex Legends e Star Wars Jedi: Fallen Order. Aínda que Electronic Arts perdeu a exclusividade á hora de desenvolver xogos de Star Wars —Ubisoft xa anunciou o seu—, a compañía sempre comentou que a súa idea era seguir elaborando xogos desta marca, sempre que chegase a acordos con ela.

Son, de socato, boas novas, malia afastar a fermosa idea de termos un título que continúe a xogabilidade e a historia de Titanfall.