Actualidade Fall Guys anuncia a súa Tempada 3 e promete temperaturas xeadas

Fall Guys anuncia a súa Tempada 3 e promete temperaturas xeadas

Aínda que alcanzou o seu punto de popularidade máis alto hai uns meses, Fall Guys continúa o seu camiño. Mediatonic, seguindo a liña doutros estudios e títulos multixogador, anunciou e presentou o que será a nova tempada do título, a terceira.

A Tempada 3 posuirá un aroma ártico, xélido. Co inverno e o Nadal axexando, a temática principal deste novo período tomará como referencia a neve, o xeo e outros elementos destas datas baixo o nome Winter Knockout.

Polo de agora, só puidemos ver unha única imaxe, que inclúe o que parece ser un novo escenario, amais de novos cosméticos a desbloquear como o típico boneco de neve ou o menos típico pingüín de cor rosa. Os responsábeis do xogo non especificaron que día se estreará a nova tempada, pero semella que, seguindo o contador dentro do título, será o 7 de decembro, intre no que a actual tempada finaliza.

Carlos Pereiro

Creador de Morcego. Escribo cousas, falo de cousas e encántame escoitar cousas.