Actualidade Final Fantasy VII Remake vendeu 3,5 millóns de copias en tres días

Final Fantasy VII Remake vendeu 3,5 millóns de copias en tres días

Final Fantasy VII Remake está a ser un éxito de crítica e un éxito de vendas. As cifras non minten; o novo título de Square Enix conseguiu vender en apenas tres días máis de 3.5 millóns de copias en todo o mundo, principalmente dixitais, o que o sitúa como unha das obras máis consumidas deste ano.

«Máis de 3,5 millóns de copias de Final Fantasy VII Remake distribuíronse ou vendido en dixital nos tres primeiros días», explica a compañía xaponesa. «As vendas dixitais foron particularmente moi fortes, e continúan medrando». Tamén destaca que a revisión do clásico de PlayStation recibiu unha cálida acollida por parte da prensa en todo o globo, «con xornalistas de todo o mundo que lle deron puntuacións altas e cantaron os seus encomios».

A falta de números concretos por zonas, si se sabe que no Xapón Final Fantasy VII Remake foi o xogo máis vendido durante a semana da súa estrea, sumando un total de 700.000 unidades físicas despachadas, ás que habería que sumar as dixitais. En Gran Bretaña, o xogo dirixido por Tetsuya  Nomura tamén se colocou no máis alto das listas de vendas. Hai que lembrar que, polo momento, é exclusivo de PlayStation 4.

Carlos Pereiro

Creador de Morcego. Escribo cousas, falo de cousas e encántame escoitar cousas.