Fortnivedra, o mapa que recrea a Boa Vila en Fortnite

Fortnite está a ser un dos xogos da corentena, como non podía ser doutra forma. Un illamento obrigado que moitas persoas están a aproveitar en diversas tarefas, algunhas delas artísticas. É o caso de Gabriel Nogueira, pontevedrés que dedicou parte do tempo que está na casa a recrear dentro do battle royale de Epic un dos espazos máis coñecidos da Boa Vila, a contorna da Peregrina, tal e como recolle PontevedraViva.

Nogueira, que no xogo leva por alcume gabocapo777, recoñece que leva anos facendo mapas, incluíndo o do seu barrio, Mollavao. Na súa última creación pode verse con enorme detalle edificios como o convento de San Francisco, a praza da Ferrería e outras rúas próximas. En declaracións ao medio local, o pontevedrés relata que o máis difícil foi a recreación das proporcións e as texturas, tarefa na que utilizou máis de 100 horas. O resultado é xenial.

O mapa pode ser xogado no modo creativo, introducindo o código (1965 – 5158 – 0118). A continuación tes un vídeo no que se amosa o escenario pontevedrés: