Genshin Impact superou este outubro en ingresos dixitais a NBA 2K21 e FIFA 21

Se algo  foi demostrado o ao longo dos últimos anos é que ofrecer a descarga gratuíta dun xogo pode derivar nuns ingresos, co paso dos días e dos meses, moi superiores á súa simple venda. Genshin Impact foi o xogo que máis ingresos e vendas dixitais xerou este outubro, por diante de colosos neste eido como NBA 2 K21 ou FIFA 21. Os datos foron ofrecidos por SuperData, referente no sector para este tipo de asuntos.

O título de miHoYo non lidera nas categorías individuais de ingresos, é dicir, non é o título que máis diñeiro xera en PC, nin en móbiles, nin en consolas; pero a suma das plataformas fai que sexa o líder global deste mes. Gratuíto na súa descarga, a súa monetización aparece nos micropagos que inclúe, a través de mecánicas gacha —máquina expendedora de cápsulas e xoguetes—. Só Pokémon GO conseguiu máis ingresos no apartado de móbiles o mes pasado.

NBA 2K21 aparece como o xogo que máis ingresos xerou de outubro en consolas, entre vendas dixitais e micropagos, seguido por outro habitual como é FIFA 21. A última entrega do xogo de EA Sports xa colocou máis de 1,5 millóns de copias, superando a cifra do FIFA anterior, que vendera uns 1,2 millóns na súa estrea.

Outro dato de interese achégao un dos últimos títulos de Ubisoft. Watch Dogs: Legion conseguiu superar o anterior récord da franquía e sitúase como a mellor estrea para un Watch Dogs no seu mes de lanzamento. En tres días, o título de mundo aberto vendeu case 2 millóns de copias dixitais. Star Wars: Squadrons despachou 1,1 millóns de xogos dixitais este outubro.