Actualidade Darkborn é cancelado após catro anos de desenvolvemento

Darkborn é cancelado após catro anos de desenvolvemento

Unha das realidades da industria do videoxogo é que non todos os proxectos conseguen chegar a bo porto. Decisións erróneas, movementos en falso ou simplemente mala sorte son algúns dos factores que determinan o futuro dun título. É por iso que o estudio sueco The Outsiders vén de comunicar que suspenden o desenvolvemento de Darkborn. O título de terror con ambientación viquinga levaba máis de catro anos de traballo desde o seu anuncio.

«Malia os nosos mellores esforzos para continuar, ao final tivemos que tomar a difícil decisión de paralizar o desenvolvemento do proxecto», declararon os seus membros. David Goldfarb atopábase á fronte do proxecto e tíñase plantexado lanzar a obra baixo a marca Private Division, pertencente a 2K Games. Porén, o acordo coa distribuidora rematou  en xullo do ano pasado, o que probablemente supuxo un duro pao para o seu desenvolvemento. Alén disto, o estudio xa se atopa traballando nun novo proxecto do que avanzarán detalles moi pronto.

Juan Sanmartín

Colaborador de Morcego. Videoxogos, deporte, cómics ou cine son as miñas paixóns.