Actualidade Final Fantasy VI Pixel Remaster adía a súa data de lanzamento até febreiro do 2022

Final Fantasy VI Pixel Remaster adía a súa data de lanzamento até febreiro do 2022

Square Enix decidiu seguir traballando un par de meses máis en Final Fantasy VI Pixel Remastered antes do Lanzalo de xeito oficial. A revisión dun dos Final Fantasy máis queridos e aplaudidos pola crítica e polo público non chegará até febreiro do 2022 —tiña previsto saír en decembro—, pois a compañía xaponesa sinalou que ve obrigatorio «dedicar o tempo necesario a puír os últimos detalles do desenvolvemento do xogo» e así poder «ofrecer a mellor experiencia posible».

Para compensar este atraso, o equipo responsable do título engadirá unha serie de contidos adicionais para aqueles que realicen a precompra do xogo de forma individual ou que compren o paquete Pixel Remastred en Steam. Así, ademais do xogo como tal, tamén poderás obter catro fondos de pantalla e parte da súa banda sonora con cinco das súas cancións: Locke’s Theme (Timelapse Remix), The Decisive Battle (Timelapse Remix), Terra’s Theme (Timelapse Remix), Searching for Friend (Timelapse Remix) e Aria di Mezzo Carattere (instrumental).

As anteriores entregas da mítica franquía de Square Enix foron saíndo de xeitoo progresivo desde xullo, mes no que foron lanzados o tres primeiros títulos na súa versión remasterizada, aínda que non exenta de polémica. Final Fantasy V viu a luz o 10 de novembro.

A colección Final Fantasy Pixel Remaster ata a quinta entrega xa está dispoñible en PC a través de Steam, amais de iOS e Android. Final Fantasy VI Pixel Remaster sairá para as mesmas plataformas en febreiro do 2022.

Carlos Pereiro

Creador de Morcego. Escribo cousas, falo de cousas e encántame escoitar cousas.