Actualidade Microsoft presenta e ponlle prezo á nova xeración con Xbox Series S

Microsoft presenta e ponlle prezo á nova xeración con Xbox Series S

A filtración do modelo e do prezo correu como a pólvora ao longo das últimas horas; Microsoft non quixo reter a información máis tempo. É oficial. A nova xeración de consolas americanas partirá con dous modelos diferentes: Series X e Series S. Segundo Brad Sams, xornalista de Thurrott, as máquinas chegarán cun prezo de 499 e 299 dólares respectivamente.

Polo de agora, a compañía de Redmond só confirmou o prezo do modelo máis económico, do que hai foto pero non máis información ou detalles sobre os seus compoñentes. Sexa como for, varios analistas explicaron en redes sociais que Series S contará cunha potencia de 4 Teraflops DNA2 —a súa irmá maior terá 12— e estará pensado para funcionar en pantallas cunha resolución de 1080p e non 4K.

A máquina nova é moi similar ao modelo Xbox One X, pero conta cunha ranura de ventilación redondeada no seu perfil superior. Segundo semella nas imaxes a súa posición natural será vertical, igual que Series X. Ora ben, un detalle importante e máis que visible é que non terá lector de discos, o que a converte nun modelo totalmente dixital seguindo o ronsel xa iniciado esta xeración por Microsoft. Sería o modelo máis pequeno de Xbox xamais creado.

Tanto  Xbox Series X como  Xbox Series S contarán cunha alternativa de pago a prazos en Estados Unidos, onde se ofrecerá a opción Xbox All Access. O modelo principal poderase adquirir por 35 dólares ao mes, o segundo por 25 dólares ao mes; a razón de dous anos (24 meses) con  Xbox Game Pass incluído. Haberá que agardar para ver as opcións de compra den Europa.

Carlos Pereiro

Creador de Morcego. Escribo cousas, falo de cousas e encántame escoitar cousas.

Artigos relacionados