Un outubro con moito que xogar

Xa entrados no outono, outubro configúrase como un mes de transición cara o mercado de Nadal, claro que este ano contará coa presenza dalgúns dos videoxogos máis agardados desta xeración. Por un lado, o todopoderoso Forza Horizon 4 que a crítica xa elevou como o mellor título de condución arcade xamais feito. E, por suposto, está ese Red Dead Redemption 2 de Rockstar que tan só coa súa presenza logrou que varias compañías decidiran atrasar a saída de varios dos seus lanzamentos para que estes non sufriran no seu despegue ante a forza de atracción do xogo ambientado no salvaxe oeste.

Xa mañá, estará dispoñible o novo de Ubisoft, Asassin’s Creed Odyssey, que analizaremos en Morcego nos vindeiros días.

Tamén hai outras novidades de gran interese, como ese Mega Man 11, o Super Mario Party para Switch, ou o Dark Souls Remastered que chega por fin a Nintendo. Tamén volverá a mítica saga Soulcalibur a mediados de mes coa súa sexta entrega numérica. Ollo a ese Call of Duty: Black Ops 4, que quere aproveitar o tirón dos battle royale e gañarse un oco entre os grandes do xénero. Podería facelo.