Actualidade Valorant colleita cifras de récord e confírmase como un dos éxitos do ano

Valorant colleita cifras de récord e confírmase como un dos éxitos do ano

Un dos grandes éxitos do ano está a ser Valorant, o novo título de Riot Games. O xogo comezou a súa fase de beta pechada o pasado mes de abril, contando cunha tremenda repercusión entre o público. Os datos que arroxa o informe de Arsenal.gg e StreamElements así o confirman, posto que o título acadou un total de 334 millóns de horas vistas en Twitch e máis de 1,7 millóns de espectadores simultáneos.

Por mor da crise sanitaria que se vive en todo o planeta, a audiencia das retransmisións aumentou un 45 % en xeral, e un 99 % en Twitch, se se compara coas cifras do 2019. Sexa como for, non se pode dubidar de que Valorant alcanzou esta posición por méritos de seu. Especialmente notable foi a estratexia levada a cabo por Riot para acceder ao xogo, xa que se repartían claves aleatorias a todo aquel que seguise os directos do xogo en Twitch.

Valorant deu comezo ás súas partidas competitivas, o que supón a aparición de xogadores tramposos que a compañía propietaria se encargou de bloquear, con case 9.000 persoas baneadas. O xogo xa prepara para o seu lanzamento definitivo, que será nalgún momento do verán do 2020.

Juan Sanmartín

Colaborador de Morcego. Videoxogos, deporte, cómics ou cine son as miñas paixóns.