Horizon, a nova lenda de Apex Legends, amosa as súas habilidades nun novo vídeo

Falta moi pouco para que Apex Legends estree a súa nova tempada, a sétima. Ás portas deste reinicio, Respawn aproveitou a ocasión para presentar as habilidades de Horizon, a nova lenda que incorporará ao seu battle royale. Se hai uns días era explicada a súa historia, na que lograra escapar dun buraco negro e aprendera a dominar a gravidade, é o momento de coñecer as súas habilidades.

Horizon contará coa posibilidade de crear unha corrente gravitacional para alcanzar zonas altas, pero tamén poderá atrapar nela os inimigos, polo que se revela como unha ferramenta con bastantes opcións tácticas. E a súa definitiva? A creación dun pequeno buraco negro que atrae os inimigos, provocando situacións de altísimo perigo para eles ao poñelos fóra de posición.

Programada para o 4 de novembro, mañá, a Tempada 7 de Apex Legends traerá unha nova cidade, un novo pase de tempada con obxectos cosméticos variados e engadirá a posibilidade de crear e unirse a clubs. Como todo, mellor en compañía, non?