id Software rectifica e elimina Denuvo da nova actualización de DOOM Eternal
Rectificar é de sabios e non sempre podemos ver este refrán aplicado ao mundo dos videoxogos. Nesta ocasión, id Software decidiu dar marcha atrás eliminando o sistema Denuvo da vindeira actualización de DOOM Eternal. Foi o produtor do título, Marty Stratton, quen revelou que «o feedback dos xogadores deixounos claro que temos que reevaluar o noso enfoque á hora de implementar sistemas antitrampas». Stratton tamén sinalou que a decisión de implementar Denuvo partiu deles mesmos e non de Bethesda.
Segundo o estudio, Denuvo Anti-Cheat non afectou o rendemento do xogo en PC, malia que si que se detectaron e eliminaron diversos problemas relacionados coas skins personalizábeis. Tamén foron solucionados os erros que provocaban crasheos do xogo. Desde id Software consideraron que a campaña en solitario debería poder ser gozada sen instalar o software, namentres buscan fórmulas para implementaren este tipo de tecnoloxía cunha mellor resposta por parte da comunidade.
