Zona retro Joseph Saelee, campión do mundo de Tetris con só 16 anos

Joseph Saelee, campión do mundo de Tetris con só 16 anos

Hai xogos polos que non parece pasar o tempo. Conxelados no subconsciente. Unha partida leva a outra e así toda unha tarde se un se despista. O Tetris leva dende 1984 sendo o videoxogo de quebracabezas máis famoso do mundo, e hoxe ese mundo ten un novo campión para o xogo deseñado por Alekséi Pázhitnov.

Dende hai oito anos, o título ten o seu propio torneo mundial co nome Classic Tetris World Championship. Nel xógase a unha versión especial baseada na entrega de NES, a lenda dos oito bits de Nintendo. Na práctica, é simplemente unha versión executada nun ordenador que emprega unha fórmula para xerar secuencias de pezas iguais para dous xogadores ao mesmo tempo. É dicir, evita que a sorte entre en escena e deixa todo en mans dos participantes.

No torneo deste ano, Jonas Neubauer, sete veces campión, partía como favorito, pero a través dunha partida que quedará na memoria dos deportes electrónicos Joseph Saelee, con tan só 16 anos, arrebatoulle o título cunha épica remontada. A continuación podedes ver a retransmisión oficial da recta final do torneo:

Até esta edición, Neubauer reinou con autoridade nas finais nas que participou, demostrando ser un auténtico monstro do xogo soviético. O estadounidense non puido con Saelee, que agora é o campión do mundo de Tetris e, por suposto, o competidor máis novo da historia en facerse co título.

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *