Nintendo presenta a Kazuya con 40 minutos de gameplay

Este luns 28 de xuño Nintendo fixo pública a presentación de Kazuya, de Tekken, cunha extensa retransmisión de 40 minutos. O evento estivo dedicado en exclusiva ao novo xogador de Super Smash Bros. Ultimate, que estará dispoñible o 30 de xuño por 5,99 euros, se ben é certo que aqueles que dispoñan do pase de tempada, cun prezo de 29,99 euros, poderán descargalo sen ningún custo adicional.

Masahiro Sakurai apareceu en escena para mostrar todos os combos de Kazuya. E si, todos eles foron extraídos dos xogos orixinais nos que aparece, mais é certo que foron modiciados para ser adaptados aos controis e a xogabilidade do Super Smash Bros. Ultimate. Doutra banda, o escenario que acompañará ao novo loitador será o dojo de Heihachi. Ao principio será un lugar pechado do que ninguén pode saír, pero pronto o seu teito e as súas paredes irán cedendo ao mandar voando os rivais contra estes.