Nintendo Switch xa vendeu máis unidades que 3DS

Nintendo acaba de facer público un novo informe financeiro. Nel queda recollido que Nintendo Switch pasou xa dos 79 millóns de unidades vendidas, o que significa que a máquina híbrida xa superou en vendas a Nintendo 3 DS —un dos grandes éxitos da compañía—, converténdose na cuarta consola máis exitosa a nivel de vendas da empresa.

Switch só tería por diante á Game Boy Advance, con 81,5 millóns; a Wii, con 101,6 millóns; a Game Boy / Color, con 118,7 millóns; e a Nintendo DS, con 154 millóns. É máis que probábel que nos próximos meses vexamos como escala un posto nesta clasificación. Os números da consola actual están á alza, cun incremento de unidades vendidas no últimos nove meses do 36 % respecto ao mesmo período o ano anterior.

O certo é que as previsións de Nintendo quedaron un pelín longas, pois consideraban nos seus informes que alcanzarían un incremento do 37 % nas vendas. Emporiso, a compañía xaponesa conseguiu unhas ganancias netas de 11 mil millóns de euros en todo o mundo, procedendo un 77 % delas do mercado estranxeiro, o de fóra do seu país de orixe. Doutra banda, queda evidenciado o crecemento das vendas dixitais, que se dobraron en tempos de pandemia.

Igual que consolas, tamén se venderon máis xogos que nunca. Este ano, a venda de xogos medrou un 43 %. Unha cifra que ten moito que ver coa saída de Animal Crossing: New Horizons, título que xa superou amplamente os 30 millóns de unidades distribuídas desde o seu lanzamento en marzo. Outros xogos amplamente vendidos de Switch son: Mario Kart 8: Deluxe, con 33,4 millóns de unidades desde o seu lanzamento; ou Super Smash Bros. Ultimate, con 21,10 millóns. Este ano, na lista de máis vendidos aparecen Super Mario 3D All- Stars con 8,32 millóns, Paper Mario: The Origami King con 3,05 millóns ou Ring  Fit Adventure que superou os 8 millóns de unidades vendidas desde a súa saída.