O compositor de Skyrim e o cocreador de Night in the Woods, acusados nas redes de agresión sexual

O compositor de Skyrim e o cocreador de Night in the Woods, acusados nas redes de agresión sexual

Nesta ocasión, tocoulle á industria do videoxogo verse no ollo do furacán, un que é lamentable, e que estende os seus ventos e tentáculos en todos os sectores da sociedade. Nathalie Lawhead, traballadora da industria, denunciou nas súas redes sociais un presunto caso de violación. A través dun escrito no seu blogue persoal, acusa a Jeremy Soule, creador da banda sonora de The Elder Scrolls IV: Oblivion e de Skyrim, de perpetrar a agresión sexual.

A muller, que traballou en títulos como Tetrageddon ou EIGTBOK explica que todo aconteceu no ano 2008. Segundo parece, compartía amizade co compositor, pero este interpretaba a relación dun xeito diferente. Tras o rexeitamento de Lawhead, este comezaría unha serie de coaccións e ameazas cara á traballadora, entre outros abusos, nos que se incluiría a violación, en palabras da muller.

Após  facerse público este relato, outra figura da industria, Zoë Quinn, desenvolvedora de obras como Depression Quest, inspirada pola historia de Nathalie, tamén compartiu unha experiencia similar. O seu relato implicaría ao cocreador de Night in the Woods, Alec Holowka, co que viviu por un tempo, intre no que tamén a ameazaría, ademais de sometela a supostos abusos sexuais e vexacións que a traballadora sinala na súa conta de Twitter.

As mostras de apoio cara ás dúas traballadoras non pararon de sucederse nas últimas horas. Scott Benson, outro dos creadores de Night in the Woods, posicionouse a favor de Zoë, comentando no seu perfil de Twitter que cre a súa historia, e que isto «o golpeou dunha forma moi inesperada, e mañá teremos máis que dicir», en referencia a todo o equipo.

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *