Pathfinder: Kingmaker recibe unha tradución ao castelán grazas á comunidade
Conseguir unha boa tradución dos videoxogos para todas as rexións permite a unha maior audiencia gozar das obras máis relevantes. E nunca é tarde para facelo, tal e como foi o caso de Pathfinder: Kingmaker. O RPG de fantasía vén de recibir unha tradución ao español por parte dun grupo afeccionados, concretamente a comunidade de Clandlan.
A resposta por parte dos seguidores foi tremendamente positiva, con varios picos de 5.000 xogadores simultáneos en Steam. Este labor comezou a finais do 2018 e agora dá os seus froitos. Porén, en 2019 anunciouse a súa secuela, Pathfinder: Wrath of the Righteous, que grazas ao seu financiamento en Kickstarter contará tamén con tradución ao castelán.