Söderlund, ex xefe de EA Studios, presenta Embark Studios e o seu primeiro proxecto
O ex xefe de EA Studios, Patrick Söderlund revelou o seu presente e futuro: a fundación de Embark Studios, que conta xa con máis de 50 empregados, así como a posta en marcha do seu primeiro título. O estudio en Estocolmo traballa nun prototipo que “cambiará e evolucionará” segundo o progreso, descrito coma un xogo de acción cooperativa free to play ambientado nun futuro distante, no que a colaboración é esencial para superar os problemas.
O motor gráfico que utilizarán é o Unreal Engine 4. Embark Studios preséntase ao mundo cunha proba de terreo creada por tres persoas en tres semanas. Utilizaron datos reais escaneados, colocación de obxectos mediante diversos procedementos e algunhas outras ferramentas das que dispoñen. Non é ningún tipo de anuncio oficial do xogo, pero si unha ollada á mestría que posúen coa tecnoloxía de Epic Games.
Os concept art do novo título amosan unha idea do que teñen pensado dende o estudio.
Söderlund comenta que un estudio pequeno como o seu non aspira a crear algo grande e complexo que poida ter éxito. “No seu lugar, centrámonos en ter algo rápido sobre o que se poida construír, un xogo divertido que se é popular podamos expandir con deseños e funcións que nos acheguen á nosa visión a longo prazo”.
“Nos próximos meses, imos compartir máis cousas da nosa viaxe, os retos, os problemas que con sorte resolveremos, e o que aprendamos no noso camiño. E no seu momento, se todo vai ben, teredes o anuncio oficial“. Aquí deixámosvos un vídeo que amosa do que son capaces tres dos seus traballadores.
