Actualidade PlayStation suspende as súas vendas dixitais e físicas en Rusia

PlayStation suspende as súas vendas dixitais e físicas en Rusia

Seguindo os pasos doutras compañías de videoxogos que xa suspenderon a súa actividade, tanto de venda de produtos como de servizos, en Rusia, Sony suspende as vendas dixitais e de envíos de produtos ao país gobernado por Putin até novo aviso. É unha forma de castigo pola invasión de Ucraína acometida nos últimos tempos.

Hai uns días, a marca xaponesa xa cesara a venda de Gran Turismo 7 en territorio ruso, o último lanzamento de relevancia pola súa banda. «Sony Interactive Entertainment únese á comunidade global que pide paz en Ucraína», reza o comunicado da compañía. «Suspendemos todos os envíos de hardware e software, o lanzamento de Gran Turismo 7 e as operacións da PlayStation Store en Rusia».

Ademais destas medidas, Sony tamén confirma a doazón de dous millóns de dólares a organizacións humanitarias que se atopan traballando na zona. Outras empresas que tomaron medidas semellantes son Microsoft, EA, CD Projekt, Activision-Blizzard, Ubisoft ou Take-Two.

Carlos Pereiro

Creador de Morcego. Escribo cousas, falo de cousas e encántame escoitar cousas.