Actualidade Resident Evil 3 amosa as rúas de Racoon City nun novo gameplay

Resident Evil 3 amosa as rúas de Racoon City nun novo gameplay

Menos dun mes teremos que agardar para percorrermos as rúas de Racoon City xunto con Jill Valentine. É por iso que Capcom comezou a campaña de promoción de Resident Evil 3, ofrecendo novo contido sobre este remake do clásico de 1999. É o momento dun novo gameplay de 20 minutos de duración, no que podemos ver algunhas novidades interesantes.

Entre elas destaca que o coitelo xa non se desgasta polo seu ueso, ademais, poderemos esquivar os zombis e apartalos rapidamente cando nos atrapen grazas a un quick time event. A través do motor gráfico RE Engine, é posíbel apreciar durante a partida a calidade gráfica do título en detalles como o exterior das tendas ou os carteis de neon. Tamén se revelaron outros aspectos, como que existirán varios atallos polos que poder desprazarnos entre diferentes zonas da cidade.

Resident Evil 3 chegará a PS4, Xbox One e PC o vindeiro 3 de abril, aínda que antes do lanzamento contaremos cunha demo para nos facer unha idea do que nos espera durante os nosos encontros contra Némesis.

Juan Sanmartín

Colaborador de Morcego. Videoxogos, deporte, cómics ou cine son as miñas paixóns.