Actualidade Sony dá un salto cara á retrocompatibilidade total

Sony dá un salto cara á retrocompatibilidade total

A proximidade da nova xeración de consolas é un feito. Moi probablemente, ao longo do ano 2020 veremos como Sony e Microsoft lanzan os seus próximos modelos d Xbox e de PlayStation ao mercado. Sen dúbida, unha das peticións máis reclamadas polos usuarios é a da retrocompatibilidade: poder xogar aos seus vellos títulos, que xa temos, nestas novas plataformas. Unha petición histórica que a día de hoxe antóllase máis que necesaria. Sony acaba de mover ficha.

A división xaponesa de Sony vén de rexistrar unha patente que permitirá á súa próxima máquina, en teoría, a PlayStation 5, ter retrocompatibilidade con todas as consolas de sobremesa anteriores, a saber: PS4, PS3, PS2 e PSX.

A información viralizouse a través dun artigo en castelán de HobbyConsolas, realizado a partires dun escrito xaponés publicado por Hokanko, o primeiro día de febreiro. Neste documento aparecen algunhas gráficas do funcionamento técnico deste novo sistema.

 

Modelos PSX, PS2, PS3 e PS4.

O responsable principal do seu deseño sería Mark Cerny, coñecido por ser tamén o home detrás da arquitectura interna de PS Vita e PS4, así como de diversos títulos xogables a día de hoxe. A pregunta é sinxela, como funcionaría esta retrocompatibilidade?

Segundo a patente 2019-503013, número que posúe no seu rexistro nipón, calquera título das pasadas xeracións podería introducirse no dispositivo e funcionar correctamente, tanto CD, coma DVD ou Blu-Ray. Ao parecer, o procesador emularía o comportamento das vellas CPU de Sony ao poder detectar os requirimentos de cada xogo introducido, adaptando a o seu comportamento á devandita petición. É dicir, imitaría cada consola á perfección.

E non haberá melloras nos xogos? É posible, xa que o procesador debería ser infinitamente máis rápido que o que tiñan aquelas máquinas, polo que a porta está aberta a posibles optimizacións como menores tempos de carga ou mellores resolucións.

Por suposto, Sony non confirmou que este sistema vaia estar incluído na súa futura consola de sobremesa. Certamente, é habitual que as empresas rexistren diversas patentes co simple obxectivo de adiantarse á competencia ou por mera seguridade dos seus intereses. O seu uso non está nin moito menos asegurado, pero agora sabemos que está aí

Evolución das consolas de Sony ao longo de dúas décadas.

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *