Sony revela as especificacións técnicas de PlayStation 5

Sony vén de poñer as súas primeiras cartas sobre a mesa. A compañía xaponesa, gañadora indiscutíbel da xeración actual de consolas, mantivo ao longo dos últimos meses un silencio total á hora de falar da súa futura máquina, a diferenza de Microsoft, que si foi ofrecendo máis información, incluíndo imaxes, obras e especificacións. Sexa como for, PlayStation 5 fixo públicas as súas especificacións técnicas ao detalle, aínda que non houbo rastro do aspecto da consola, nin do seu prezo, nin dalgunha futura obra.

A través dun longo vídeo, Mark Cerny explica os cambios que levarán á marca PlayStation á nova xeración, que pasa, a grandes liñas, nunha capacidade para a potencia e a velocidade moito maior que a súa antecesora. Fóra de calquera dúbida, Sony quere seguir mantendo excelentes colaboracións coas desenvolvedoras, apostando por un hardware no que estean cómodas para traballaren.

As entrañas de PlayStation 5

O certo é que a presentación de hoxe estaba destinada a ocorrer no escenario da GDC, pero a non asistencia debido ao coronavirus frustrou o plan inicial. A través dun relato totalmente técnico, Cerny debullou as particularidades da súa nova máquina, permitindo coñecer máis detalles sobre o procesador AMD que cargará, a arquitectura de CPUs Zen 2 de AMD ou o tamaño do seu SSD. A continuación podes comparar a consola actual coa súa próxima irmá.