Square Enix deixará traballar dende casa aos seus empregados de xeito indefinido

A crise do coronavirus afectou á industria do videoxogo de dúas maneiras simultáneas e en contraste: un aumento probado do número de xogadores e das vendas, pero tamén a imposibilidade de desenvolver videoxogos como se viña facendo até o de agora. As compañías tiveron que mudar prácticas por mor da pandemia e algunhas, como é o caso de Square Enix, semella que aproveitaron a situación para implantar novos métodos de traballo.

Nun comunicado oficial, a empresa xaponesa fixo público que desde o 1 de decembro, con coronavirus ou sin el, ofrecerá a todo o seu persoal —ou polo menos os implicados na creación directa de xogos— a posibilidade de traballar desde casa se así o desexan. A medida fora só pensada para o confinamento e evitar contaxios, pero manterase no tempo.

Square Enix explica que quere crear así unha contorna de traballo máis flexible e diversa, esperando mesmo aumentar a produtividade dos seus empregados ao conseguiren un equilibrio ideal entre a súa vida laboral e persoal. Ademais, abren a porta para solucionar de xeito veloz calquera incidente que poida acontecer no futuro.

A compañía agarda que a partir do mes que vén o 80 % do seu persoal pase a realizar os seus labores profesionais desde casa.