Análises Summer in Mara :: Unha marea un chisco irregular

Summer in Mara :: Unha marea un chisco irregular

Do diminuto ao inmenso. O estudio valenciano Chibig Studio lembra que «we are not developing games, we are creating a universe», unha declaración de intencións que se mostra en cada pinga dos seus títulos. As súas primeiras obras-Tiny Planet e Ankora-funcionaron como pequenas sementes dunha árbore maior e que creceu até dar forma finalmente en Deiland.

Summer in Mara é o alumno máis avantaxado de todos eles, cunha fórmula que non nos é allea, pero que sempre se permite o oco á innovación. O xogo inspirado na obra cume de Antoine de Saint-Exupéry permitía gozar do recollemento do noso pequeno planeta; agora toca saír ao mar.

O comezo do verán

Antes de lanzarnos á aventura, temos que dar os nosos primeiros pasos. Summer in Mara é un xogo no que teremos que xestionar de forma constante os nosos recursos: cultivar verduras e hortalizas, vixiar os nosos medidores de fame e cansazo, construír novas estruturas… E unha mensaxe sempre orbita ao redor de toda a experiencia e é que non te angusties e reláxate.

Tomamos o mando de Koa, unha nena que é rescatada nun naufraxio por unha membro dos Qüido chamada Haku, pero á que nosa protagonista, de xeito agarimoso, inclúelle o apelativo de Yaya Haku. Ela será quen nos guíe durante os primeiros minutos de xogo, poñendo enriba da mesa algúns dos mantras que se repetirán de forma continua durante a partida e como podemos facer para ser nós mesmos.

Koa terá que aprender que a natureza é un ciclo eterno que hai que preservar.

Anos despois, Koa atópase soa na súa illa, un pequeno paraíso que podemos ir mudando ao noso gusto co paso do tempo. Malia que dispoñemos do esencial, a exploración chama á porta con furia e finalmente imos até o mar co noso barco.

A illa máis próxima é á súa vez a máis grande, Qüalis. Un pobo cun sabor e ambiente mediterráneo en cada unha das súas esquinas, habitada principalmente por Qüidos, pero con oco para seres de todas as razas posíbeis. Koa comezará decatarse de que o seu mundo vai moito máis alá do horizonte que se pode ver desde a súa illa.

A vida pirata é a vida mellor

O noso periplo por Mara susténtase en dúas mecánicas fundamentais: navegar e realizar encargos. Constantemente recibiremos pedidos por parte de personaxes a mar de simpáticos, con personalidades propias que nos arroxan diálogos sinxelos pero entretidos. Non só limítanse a encargarnos un novo prato de cociña ou un elemento de bricolaxe, senón que arroxan contexto sobre a historia de Mara e deles mesmos. Todo iso acompañado dunhas ilustracións moi agradables.

Os debuxos realizados para os personaxes e fondos destilan un gran coidado.

Para cumprir todas estas tarefas, Koa terá que apañar para conseguir os materiais necesarios. Sementes de algodón, de leituga, cenorias, pedras, ferro ou prata son algúns dos elementos que nos acompañarán constantemente. Son moitos máis os que hai e todos serven para elaborar toda sorte de utensilios e comidas.

Un dos problemas principais que entorpecía a sensación de progresión en Deiland era o límite dos campos de cultivo. Nesta ocasión contamos con até doce terreos, aínda que de inicio estarán limitados pola maleza e as rocas, polo que teremos que fabricar mellores ferramentas para conseguir máis espazo para o cultivo. Erro emendado.

Pesca, minería, xardinería ou o coidado da granxa. Moitas das tarefas e disciplinas que abarcaremos requiren dun chisco da nosa atención se queremos crear unha contorna no que nos guste espertar cada mañá. As posibilidades para decorar e mellorar o noso recuncho entre a natureza son variadas, con bancos, estatuas ou randeeiras.

As pedras do camiño

Porén, a sensación tras máis de vinte horas de xogo é de repetición. Xérase unha impresión de que existen multitude de misións de recheo, nas que non sucede absolutamente nada relevante para a trama tanto xeral como particular dos personaxes. Caleb, Napopo, Edegan ou Taka son personaxes que posúen personalidades propias, non así os seus recados.

Aprender a facer un peixe goloso ou unha paella pode resultar entretido as primeiras veces, pero a constante reiteración desta fórmula prexudica ao resultado final. Son moi positivos as mensaxes insistentes de fomento á ecoloxía, de respecto ao próximo, de coidado da natureza e mesmo de aceptar a perda dos nosos seres queridos. O ton xeral do título é moi educativo neste sentido, mais o o efecto dilúese co paso das misións.

Se as ilustracións e as escenas cinemáticas raian a un grandísimo nivel, non podemos dicir o mesmo do nivel gráfico. Summer in Mara presenta pequenos illotes e un pobo repleto de persoas, pero que non está realmente vivo. Bótanse en falta certa variedade de animacións para os personaxes ou maiores posibilidades para interactuar cos habitantes de cada rexión de Mara. A banda sonora acompaña perfectamente e alivia esa sensación, aínda que é inevitábel notar que camiñamos entre estatuas.

Uns pensamentos que non concordan coa variedade de terreo que podemos descubrir. Desde diminutas illas que gardan tesouros, pasando por atoles habitados con novas froitas ou minerais que explotar e até o frío máis norteño conforman o abanico de paisaxes dispoñíbeis. Unha nova interrogación no mapa indica que algo inesperado agarda. Mesmo o fondo do oceáno garda máis dun cofre perdido.

O mercado de Qüalis será un dos lugares máis visitados durante a partida.

É importante lembrar que Summer in Mara é un proxecto financiado en Kickstarter co apoio de miles de persoas, e deseñado por un grupo de menos de dez persoas. Chibig Studio impregna da súa esencia cada un dos seus títulos, volvéndoos totalmente recoñecíbeis cunha simple ollada. Compoñer un apartado visual de seu é francamente loable.

O estudio realizou o paso lóxico de ampliar os seus límites, proporcionando unha aventura moito máis aberta que as súas anteriores obras. Porén, iso non lle impide posuír un ritmo irregular ao longo das súas vinte horas de xogo. A duración do xogo non sempre ten por que ser acorde á expansión do seu territorio.

Se vos gustou Deiland, encantaravos Summer in Mara. Unha experiencia moi similar nas súas mecánicas, no que o ambiente relaxado e despreocupado —aínda cos seus fallos— levaravos da man constantemente. Non pretende ser un xogo de xestión e crafteo que demande unha grande atención por parte do xogador, tan só quere que te sintas levar polas ondas.

*Análise feita cun código para Steam ofrecido polo estudio

6.2

O mellor

  • Podes xogar como queiras, deixando atrás calquera preocupación
  • As ilustracións e debuxos permiten crear un selo visual de seu
  • As mensaxes positivas que contén: ecoloxía, coidado da natureza...

O peor

  • Ritmo moi irregular; acaba por ser repetitivo
  • A nivel gráfico e técnico necesita moito máis puído
Juan Sanmartín

Colaborador de Morcego. Videoxogos, deporte, cómics ou cine son as miñas paixóns.