Temtem chegará a PS5 este decembro en forma de exclusiva temporal

Un dos fenómenos deste ano foi o título do estudio madrileño Crema Games. Temtem conseguiu namorar a millóns de xogadores cunha proposta alternativa á poderosa franquía de Pokémon e após o seu paso por PC en fase de acceso anticipado, agora expande as súas fronteiras.

A desenvolvedora confirmou que Temtem chegará a PS5, a consola de nova xeración de Sony. A través dunha exclusiva temporal e mantendo a estrutura de acceso anticipado, poderemos gozar de catro das seis illas existentes, con máis de 100 criaturas ao longo do xogo. Estará dispoñíbel a partir do 8 de decembro e progresivamente irá recibindo novo contido.