Terraria establece o seu récord de xogadores en Steam após a súa derradeira actualización

Nove anos despois do seu lanzamento, Terraria vén de recibir a súa última gran actualización. Terraria: Journey’s End é o DLC gratuíto que os seus responsábeis, Re-Logic, engadiron antes da finalización do soporte ao título. Centos de novos obxectos e mecánicas foron incluídas e unha das máis destacadas é o tModLoader para a versión de PC, unha característica que permite instalar múltiples mods creados pola comunidade de xogadores.

Con motivo da chegada desta gran cantidade de contido, Terraria bateu o seu récord de xogadores simultáneos en Steam cun total de 489.886 xogadores, colocándose como o terceiro xogo con maior afluencia na plataforma de Valve durante o día de onte. Máis de 30 millóns de copias vendidas despois, Terraria é considerado como un éxito masivo grazas ás súas mecánicas de exploración e aventura, lembrando outro exemplo de éxito como foi —e é— Minecraft, pero adquirindo unha personalidade de seu.