Todo o que precisas saber do Nintendo Direct

Como non podía ser doutra maneira, aquí tendes os xogos máis destacado do Nintendo  Direct que puidemos gozar onte, mércores 13 de febreiro.

• Super Mario  Maker 2

Comezou da mellor maneira posible o Nintendo  Direct co regreso do noso fontaneiro favorito. Super Mario Maker 2, a continuación da exitosa entrega de  Wii U en 2015, será unha realidade a partir de xuño de 2019 en  Nintendo  Switch. E polo que amosou Nintendo, parece que non vai decepcionar.

Este novo título contará cos acenos de identidade que fixeron que o primeiro se convertese nun éxito de vendas. Ademais de poder crear e editar os niveis que nos permita a imaxinación, dispoñeremos de novas ferramentas á nosa disposición coma o avance en vertical ou unha disposición das pezas en forma de ruleta, o que permite unha maior accesibilidade.

• Marvel  Ultimate  Alliance 3:  The Black  Order

Pasaron dez anos desde a última entrega dunha das sagas máis aclamadas dos fans dos cómics. Marvel Ultimate  Alliance 3:  The Black  Order chegará a  Nintendo  Switch tras unha década, cos  Vengadores, a Patrulla X e compañía, dispostos a pararlle os pés definitivamente a Thanos.

Entre as novidades que puidemos coñecer, atópase a posibilidade de xogar con até tres amigos máis a través dunha conexión local ou en liña. Grazas aos gráficos de estética de banda deseñada, poderemos gozar de combater xunto aos nosos amigos para poder executar devastadores ataques en equipo chamados Alianza Extrema Definitiva. O que si que parece definitivo é que este mesmo verán poderemos gozalo nas nosas consolas.

• Box  Boy!+  Box  Girl!

Atopámonos ante a chegada a  Nintendo  Switch dun xogo pertencente á súa irmá pequena,  Nintendo 3 DS. Este título proponnos controlar a Qbby, unha pequena caixa que se ve na obriga de superar todos os obstáculos que xorden no seu camiño. Para iso, contará coa habilidade de xerar máis caixas que lle axuden. Desta vez terá ao seu carón á súa homónima feminina para axudarlle.

Ao longo de 270 niveis poderemos retar ao noso cerebro para resolver todos os quebracabezas posibles. Se aínda así quedades con gana de máis, Qudy, un simpático rectángulo poderá ser controlado ao rematar a historia principal, achegando un maior desafío aos máis  completistas. Box  Boy!+  Box  Girl! chegará o 26 de abril de 2019.

Xurdirá o amor entre as dúas caixas?

• Super  Smash  Bros  Ultimate

Unha dos grandes títulos da compañía xaponesa recibirá unha nova personaxe para aportar aínda máis variedade de loitadores.  Joker, pertencente á franquía Persoa, chegará a Nintendo Switch esta primavera en forma de DLC de pago, no que denominaron Pack do aspirante 1.

Ademais, revelouse que novos  Amiibo atópanse en camiño para este 2019. Entre eles atópanse Solid Snake, Simon,  Squirtle, Ivysaur e o Adestrador Pokémon. Preparade as vosas billeteiras, aproxímanse compras.

• Captain Toad: Treasure  Tracker

As aventuras do noso cogomelo favorito non remataron. Grazas a unha actualización de balde para Nintendo Switch, agora poderemos xogar acompañados. Todos os niveis da aventura atópanse actualmente dispoñibles para ser percorridos no modo cooperativo e así realizar un repaso ao título con quen queiras.

Tamén poderemos gozar de 5 niveis inéditos até agora. Iso si, desta vez teremos que tirar de aforros, xa que o contido descargable será de pago. O 14 de marzo poderemos vivir este novo contido na versión de Nintendo Switch, aínda que se reservades antes da data poderedes gozar do primeiro nivel de forma anticipada.

Teremos que facer equipo para poder salvar todas as dificultades.

• Bloodstained: Ritual  of  the  Night

Nintendo preséntanos nesta ocasión unha proposta moi atractiva por parte de 505  Games, a través do scroll lateral clásico pero con ideas moi interesantes. Nesta nova aventura controlaremos a lady Miriam, posuidora da maldición do alquimista que terá que enfrontarse aos demos que pertencen ao antigo posuidor da maldición, Gebel.

Atravesando as portas do seu castelo, teremos á nosa disposición varias habilidades, tales como roubar as dos inimigos, inverter a gravidade ou transformarnos nun raio co que poder avanzar a gran velocidade e superar zonas inaccesibles. Á súa vez, poderemos gozar de numerosas misións secundarias e poderemos personalizar a Miriam ao noso gusto. Bloodstained: Ritual of the Night chegará no verán de 2019 a Nintendo Switch.

• Dragon  Quest  Builders 2

Square  Enix encárgase de traer a secuela do seu título de construción e supervivencia baseado na franquía de  Dragon  Quest. Cos reconocibles debuxos de  Akira  Toriyama,  Dragon  Quest  Builders 2 proponnos penetrarnos no modo historia no que construír o noso destino ou unirnos no modo cooperativo, tanto local como en liña, xunto a 3 Construtores máis.

Construción de estruturas, ferramentas e a recolección de materiais serán as principais mecánicas que dispoñeremos para poder crear o noso mundo a pracer, que esta vez poderá ser xogado en primeira persoa, baixa a auga ou polo aire. Esta secuela sairá en  Nintendo  Switch o 12 de xullo de 2019.

Dous cerebros traballan mellor que un.

• Dragon Quest XI  S: Ecos dun pasado perdido – Edición definitiva

Cun título que faría sorrir a  Tetsuya  Nomura, atopámonos ante a revisión do título lanzado orixinalmente en 2017 para todas as plataformas. Será no outono de 2019 cando chegue ás nosas mans a versión para Nintendo Switch. Entre as principais novidades, atópase a elección de voces en xaponés ou inglés, poder modificar a música entre orquestra instrumental ou clásica en calquera momento, ou poder xogar en 2D, ao estilo 16 bits que rememora as entregas máis antigas.

• Disney  Tsum  Tsum Festival

Esta vez é Bandai Namco a que nos presenta este desenfadado título para toda a familia. En Disney  Tsum  Tsum poderemos controlar a peluches baseados nos personaxes máis  icónicos da compañía Disney en varios minixogos, tanto cooperativos locais como en liña. Unha proposta familiar que chegará a Nintendo Switch nalgún momento do 2019.

Un xogo para distraerse e non pensar demasiado.

• Starlink: Battle for Atlas

E unha nova actualización para o título protagonizado por Fox e compañía. Nesta ocasión, contaremos con habilidades específicas de cada personaxe para que poidan enfrontarse aos infames membros de Star Wolf. Novas misións, carreiras de naves ou eventos de facción son algunhas das novidades presentadas onte para unha actualización que ten como data de saída o mes de abril.

Os enfrontamentos serán máis duros que nunca.

• Rune Factory 4 Special

Un  remaster que trae Nintendo para  Switch. Este clásico JRPG permite criar monstros, cultivar a nosa propia comida ou pescar e cociñar suculentos pratos para os nosos protagonistas. Ademais, poderemos contraer matrimonio con outros personaxes e enfrontarnos a un dos retos máis complicados de todos: o matrimonio. Rune Factory 4  Special aterrará en Nintendo Switch  nalgún momento deste ano.

A beleza non lla quita ninguén.

• Oninaki

Outro título dos presentados vén da man dos creadores de I Am Setsuna e  LOST SPHEAR. Entraremos na pel de Kagachi, un mozo que debe salvagardar a orde entre o mundo dos vivos e os mortos. Para iso, deberá viaxar entre ambos espazos e protexer as almas perdidas para así obter novos poderes.

Será fundamental combinar as habilidades que vaiamos adquirindo ao longo da aventura se queremos ter algunha oportunidade. Para xogalo haberá que agardar ao verán.

• Yoshi’s Crafted World

Unha das personaxes máis queridas dos fans de Nintendo está de volta.  Yoshi’s Crafted World é o novo xogo baseado no dinosauro verde e que nos volve amosar o seu xenial deseño. Esta vez tocou ver a Yoshi facer balsismo, competir en coches solares ou sucar os ceos sobre avionetas.

Ademais, poderemos intercambiar moedas do xogo por vestimentas de manualidades que nos proporcionará un pouco de protección fronte aos inimigos. Poderemos escoller entre 180 vestimentas de todo tipo cos que personalizar a  Yoshi. Tendes xa dispoñible unha versión de proba do primeiro nivel dun título que sairá o 29 de marzo de 2019.

Imposible non sentir un aquel por este xogo.

• Fire Emblem: Three Houses

Unha das pezas centrais xa anunciadas antes do  Nintendo Direct era a nova entrega da saga Fire Emblem. A proposta é bastante ambiciosa, xa que poderemos encarnar tanto a un heroe como a unha heroína. O noso protagonista terá que alistarse na Academia de Oficiais do Mosteiro de Garreg Mach, pertencente ao reino de Fódlan. Iso si, nesta ocasión non seremos alumnos, senón profesores.

Ao máis puro estilo  Hogwarts, deberemos escoller unha das tres casas nas que impartir cátedra, coas peculiaridades e problemas propios de cada unha. A través das túas leccións, deberás impartir clases coas que mellorar as habilidades dos teus alumnos e comandalos en misións baseadas no combate de estratexia por quendas. Fire  Emblem: Three Houses chegará a Switch o 26 de xullo de 2019, o que supón unha demora duns meses respecto das datas previstas.

• Tetris 99

Tetris reinvéntase e proponnos unha modalidade battle royale para este clásico. Teremos que facer fronte a 98 xogadores para demostrar que só pode quedar un á hora de completar liñas. Este título é exclusivo dos subscritores de  intendo Switch Online e atópase xa dispoñible. Que treman Apex  Legends e Fortnite, Tetris 99 acábase de unir á festa.

• Dead by Deadlight

Outro título adaptado a Nintendo Switch. Un xogo baseado no gato e o rato, no que un xogador encarnará ao asasino mentres o resto dos xogadores terán que agocharse da súa mirada e evitar calquera enfrontamento se queren saír vivos de tan adversa situación.

Haberá múltiples personaxes, mapas e obxectos de personalización á nosa disposición para facer deste sanguento título algo máis cunha persecución inxusta. Tamén teremos un sistema de progresión co que mellorar as nosas habilidades. Dead by Deadlight sairá durante o outono de 2019.

• Deltarune: Chapter 1

Toby Fox, creador do aclamado Undertale, preséntanos a nova obra que estaban a agardar con tanta gana os fans dese título. Pouco podemos contar acerca da súa xogabilidade, xa que o bo de Toby censurou a maior parte do seu propio tráiler aínda que algunhas das mecánicas típicas parece que estarán de volta. Poderemos gozar deste título a partires do 28 de febreiro na Nintendo eShop . Ademais, puidemos saber que actualmente se atopan máis capítulos en desenvolvemento, aínda que esta vez si que serán de pago.

• Daemon X Machina

Kenichiro Tsukuda, produtor de Daemon X Machina, fixo acto de aparición para contarnos as últimas novidades respecto ao título. E é que tendes dispoñible por tempo limitado unha versión de proba na  Nintendo eShop chamada Misións Prototipo. Nela poderemos gozar de atée catro misións, explorar os controis e comprobar as opcións de personalización do noso robot. Tamén estará dispoñible o combate contra un dos xefes finais, para que poidades retarvos a vós mesmos.

Iso si, esta versión de proba atópase dispoñible unicamente durante un tempo limitado, así que darvos présa se queredes facervos cunha copia. Poderedes responder a unha enquisa respecto das vosas sensacións co título se sodes seleccionados para esta tarefa. Daemon X Machina sairá no verán de 2019.

• GRID Autosport

Codemasters tráenos unha entrega dun dos seus títulos de referencia no ámbito da condución. Até cen coches e cen circuítos, como Spa ou as rúas de Barcelona, estarán á nosa disposición. Tamén poderemos personalizar os controis segundo as nosas preferencias.

Como non pode ser doutra maneira, os modos multixogador offline e online estarán dispoñibles, así como Carreiras Urbanas ou o Derbi de demolición. Cun apartado gráfico moi sólido,  GRID Autosport chegará a Nintendo, unha vez máis, de cara ao verán.

• Hellblade: Senua’s  Sacrifice

O aclamado título de Ninja Theory chega á consola de Nintendo. Afianzado por numerosos premios e por tocar temáticas pouco comúns nos videoxogos como a depresión e a tolemia,  Hellblade poderá ser gozado por todos os usuarios de Nintendo Switch nalgún momento desta primavera próxima.

• Mortal  Kombat 11

Con 25 anos ás súas costas, a saga máis sanguenta de loita, aterrará en  Nintendo  Switch o 23 de abril de 2019. Gore,  fatalities e moita diversión é o que nos agarda nun dos xogos de referencia no apartado da loita.

Non van faltar os brutais ataques característicos da franquía.

• Unravel Two

A continuación da entrega de  Electronic  Arts que namorou a todo o mundo hai apenas uns anos, chega desta volta a Nintendo. Coa posibilidade de poder xogar no modo cooperativo controlando a dous Yarnys como principal atractivo,  Unravel Two estrearase en  Switch o 22 de marzo de 2019.

• Assassin’s Creed III Remastered

Poida que non sexa o  remaster que todo o mundo pedise pero seguro que haberá fans que queden satisfeitos con volver vivir a época da Guerra da Independencia dos Estados Unidos. Tamén poderemos xogar a Assassin’s Creed  Liberation Remastered, título independente da historia. Dispoñible o 21 de maio.

• Franquía Final Fantasy

Era o único sitio onde aínda non estaban e non se podían permitir tal pecado. Final  Fantasy VII e IX sairán en Nintendo Switch. O 26 de marzo será o momento do VII, mentres que o IX atópase dispoñible no momento que estades a ler estas liñas. Ademais, Chocobo’s Mistery Dungeon EVERY BUDDY! tardará un pouco menos en facer a súa aparición, o 20 de marzo.

• Astral Chain

Hideki  Kamiya,  Masakazu  Katsura e  Takahisa  Taura atópanse á fronte da nova entrega de Platinum  Games. A compañía creadora de xogos como Vanquish ou Bayonetta, presenta o seu novo título ambientado nun futuro distópico que lembra a Blade Runner aínda que cunha estética máis propia dun anime.

O 30 de agosto de 2019 poderemos comprobar exactamente as mecánicas deste novo proxecto que de seguro non defraudará aos amantes dos hack & slash máis esixentes. Por certo, Bayonetta 3 atópase en desenvolvemento, así que todos os amantes da bruxa podedes respirar tranquilos.

• The Legend of  Zelda: Link’s Awakening

Un dos títulos máis clásicos da franquía regresa 26 anos despois de ser lanzado na Game Boy orixinal. Desta vez, e de maneira totalmente renovada, todo o mundo poderá volver estar na pel de Link e vivir aventuras por unha terra descoñecida chea de misterios e perigos. Será durante este 2019, o momento no que poderemos facernos cun xogo do que vos informaremos en canto vaian saindo máis detalles.