eSports Valve estrea o seu novo True Sight e amosa a épica de The International 2018

Valve estrea o seu novo True Sight e amosa a épica de The International 2018

É o torneo de deportes electrónicos que máis premios en metálico ofrece. O soño dos xogadores de Dota 2 feito realidade, pero ao alcance de moi poucos. The International acaparou diferentes récords ao longo dos últimos anos, e a súa realización e produción segue sendo motivo de encomio. Valve vén de estrearo documental sobre a súa enorme final, acontecida o pasado verán, unha estampa que se leva repetindo dende o 2011. True Sight mostra as reviravoltas na que foi unha das finais máis épicas da historia de Dota 2, o enfrontamento entre OG e PSG. LGD.

Con medio millón de visualizacións en apenas 12 horas, o documental é unha peza audiovisual de enorme interese para os afeccionados de Dota 2. Mostra a cara oculta dos xogadores a través das súas conversas, dos seus temores e das súas dúbidas. Un billete cara o interior das cabinas de xogo onde a maxia deste MOBA ocorre, dende a fase de drafteo ao gg final.

OG, comandado por Johan “N0tail” Sundstein, demostrou que todo é posible no título de Valve, ao alzarse coa vitoria tras cinco partidas de auténtica tolemia. Moi poucos analistas e moi poucos espectadores apostaron por Ana, Jerax, Ceb, Topson e N0 tail como novos campións da International, nin sequera como finalistas do torneo. Pero as predicións están para romper. Sen dúbida.

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *