Vigo Retro, ou como viaxar a outra época cada sábado de xuño

Din na súa páxina que non queren vivir no pasado, tan só difundir determinadas facetas que quedaron no esquecemento; e claro, iso inclúe «cacharreo» e alguna que outra partida. Ao longo de todo este mes de xuño, Vigo Retro funciona como un encontro espontáneo entre todas aquelas persoas que teñen algo en común: paixón pola retroinformática.

Cada sábado deste mes, Vigo Retro abre as súas portas na rúa Eugenio Arbones de Vigo para gozar desas vellas máquinas que algúns puidemos coñecer no seu día –e os que non agora teñen a oportunidade de facelo–, compartir conversas, anécdotas e, como non, botar un anaco cun mando na man. Xa van tres citas, vas faltar as dúas que quedan?

Explica Francisco Romero ‘Entebras’, organizador principal de Vigo Retro, que as reunións «están abertas á xente que medramos na liña de Comandos MS-DOS e cargando programas en casete». Non é só unha cita para os que agora levan o adxectivo gamers, senón que tamén adoita haber xente que trastea con este tipo de máquinas –un pode atopar neste refuxio do retro consolas e trebellos desde 1982 até 2003–, coma a Atari 2600. Tamén un pode atopar software orixinal e moito homebrew da escena de 8 bits.

Ademais, tamén hai un pequeno punto adicado ao merchandising, co fin de axudar a pagar os gastos coa venda de pósteres e outras cousiñas.

Aquí tes o cartel co enderezo completo. Se queres procurar máis información, podes entrar na páxina oficial e seguir a información no Twitter de Entebras.