Actualidade Volve a velocidade ‘made in’ Codemasters con GRID

Volve a velocidade ‘made in’ Codemasters con GRID

Codemasters vén de anunciar que GRID, unha das súas franquías máis coñecidas, está lista para o seu regreso por todo o alto. A partir do 13 de setembro, poderemos pisar o acelerador en PlayStation 4, Xbox One e PC.

A cuarta entrega desta mítica serie de condución ofrece unha intensa acción de carreiras, que abarca catro continentes por algunhas das rúas e circuítos máis famosos do mundo. Sen un subtítulo ou número que acompañe ao título principal, este novo capítulo funcionará como unha especie de renacemento espiritual para a franquía.

Poderemos competir tanto en circuítos pechados coma en rueiros urbáns.

GRID quere buscar o equilibrio perfecto, ofrecendo risco e recompensa para cada tipo de piloto. O manexo é moi sensible e posúe unha curva de aprendizaxe que pode atraer tanto aos usuarios de xogos máis casuais como aos acérrimos pilotos de simulación. A progresión recompénsase con elementos distintivos, compañeiros de equipo, cartas de xogador, logros e galardóns de pilotaxe.

Os pilotos controlados pola IA do xogo levarán ao límite ao usuario para gañarse un espazo no podio e lograr a vitoria no campionato mundial GRID World Series. Os danos realistas poden afectar tanto o rendemento como ao control do vehículo e demasiado contacto co mesmo piloto fará que este se convirta nun inimigo formidable que non se deterá ante nada á hora de buscar vinganza na competición.

Fernando Alonso tamén colle o volante

Sen necesidade de presentación, o piloto asturiano Fernando Alonso asinou como consultor de carreiras e aparecerá no propio xogo. Os xogadores participarán nun serie de eventos deportivos enfrontándose contra algúns compoñentes da FA Racing, o equipo de Alonso de eSports, a través de múltiples clases de carreira antes de enfrontarse cara a cara co ex-campión mundial de F1 no seu mítico Renault R26, nun épico enfrontamento final.

«GRID como franquía de carreiras é venerada pola nosa comunidade e estamos encantados de poder levala á actual xeración de consolas» afirma Chris Smith, director do título. «O xogo ofrece moita variedade e profundidade, dende a cantidade de vehículos modernos e clásicos, ata as localizacións e opcións de carreira. Recoñecido polo seu manexo, o xogo atraerá a todos os tipos de xogadores, desde pilotos casuais que desexen un desafío con apoio, aos pilotos de simulación que busquen gran diversión».

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *