Women in Games organiza o seu terceiro evento anual na Coruña

O terceiro evento na Coruña de Women in Games xa está aquí. A cita terá lugar o 12 de Novembro ás 9 horas no Salón de Actos da Facultade de Comunicación Audiovisual da Universidade da Coruña, e contará coas intervencións de Sara Álvarez Cubelos (Lead Environment Artist en Gato Studio), Eugenia Suárez Núñez (3D Artist en Gato Studio), Bárbara Martínez Solé (Environment Artist en Gato Studio) e Ana Barrós Calvete (co-fundadora de Identik3D).

O evento será de balde, e consistirá nunha serie de clases maxistrais sobre cada unha das especialidades das relatoras —terreo, personaxes, escenarios e impresión 3D; respectivamente—, precedidas por un panel no que explicarán o seu traballo: en que consiste, cales son as súas responsabilidades, por que optaron por esa especialización e que estudaron para conseguilo.

A edición de 2019 está coordinada pola embaixadora local de Women in Games na Coruña, en colaboración coa Universidade da Coruña e a Facultade de Comunicación Audiovisual e patrocinada por Campus Innova, o Centro de Estudos de Xénero e Feministas (CEXEF), Gato Studio e Google.

Women in Games (WiGJ) é unha asociación internacional con sede en Londres que traballa activamente para incrementar o número de mulleres que se adican profesionalmente ao sector dos videoxogos, e do que na actualidade conforman tan só en torno a un 20 %. En Marzo de 2017, WiGJ, en colaboración con Google, lanzou o Programa de Embaixadores de Women in Games. A dirección da asociación nomeou a 40 persoas —número que na actualidade acada xa as 114—, distribuídas ao longo de máis de 10 países, co obxecto de traballar localmente para promover os obxectivos da asociación na súa contorna máis inmediata, a través do desenvolvemento de eventos, congresos, charlas, mesas redondas, obradoiros, etc. destinados a un público mixto, pero con especial interese nas mulleres que xa traballan na industria ou que están interesadas en facelo.