Xa dispoñíbel a derradeira demo de Bravely Default II para Switch

Todo listo para a estrea de Bravely Default II. Nintendo publicou este xoves un nova demo do título que pode ser descargada para a consola híbrida sen custo algún.

Trátase dunha versión de proba que permite «gozar dun bo fragmento do primeiro capítulo do xogo, que ten lugar inmediatamente despois do prólogo», segundo indica a desarrolladora. Iso si, o límite pono o tempo: cinco horas. Unha vez finalizado ese tempo, non poderás volver xogala de novo. O progreso, a falta de confirmación ou negación polos responsábeis, tampouco será conservado en caso de comprar a obra completa nun futuro.

Hai uns meses, a compañía da Gran N xa publicara un adianto similar, polo que podería ser considerada este unha nova oportunidade de coñecermos en primeira persoa o mundo que propón Square Enix na terceira entrega da franquía —lembra que en outubro foi presentado nun Nintendo Direct Mini Bravely Second—, e que verá a luz o próximo 26 de febreiro.