Xbox Game Pass xa conta con 18 millóns de subscritores e Series X é o mellor lanzamento da marca

Xbox amosa con orgullo as cifras de Xbox Game Pass e Series X|S. Os resultados financeiros do último trimestre de Microsoft son máis que positivos, pois a división de videoxogos da compañía de Redmond logrou uns ingresos de máis de 5.000 millóns de dólares, un 51 % máis do que xerou no mesmo período o ano anterior.

As novas consolas da marca convertéronse no mellor lanzamento da empresa no que se refire a sistemas de xogos, elevando a compra de hardware un 86 % e vendendo todo, ou case todo, o que a compañía é capaz de producir e distribuír.

Un servizo millonario

Boa parte do futuro de Xbox pasa polo seu Game Pass. O servizo de subscrición continúa recollendo excelentes críticas por mor do seu prezo e as súas ofertas puntuais, ofrecendo a un custo aceptable un enorme catálogo de obras, tanto en consola como en PC. O último dato publicado por Microsoft falaba de 10 millóns de usuarios, en abril deste ano; hoxe, xa contan con 18 millóns de contas activas dentro da plataforma.

Doutra banda, a marca recoñece que está a ter problemas para compracer a demanda de novas consolas, polo que é posíbel que se manteñan os problemas de abastecemento até o 31 de marzo. Ao menos no caso de Series X, pois a Series S si é máis doada de localizar nas tendas físicas ou dixitais.